++الى معرض ابوظبي للكتاب شديت الرحال++

السلام عليكم و رحمة الله و بركاته..

::::::

::::

:::

::

:

اليوم قررت اني اسير لمعرض ابوظبي للكتاب..

المهم..بتكون ثاني زيارة لي للمعرض في هذي السنة..

المرة الاولى كانت رحلة مع المدرسة..

بس كانت سيئة!!

يعني كان التوقيت الي رحنا في المعرض غير مناسب ابداً..

لانه كان وقت يمتلأ فيه المعرض بالطلاب..

من بنات و اولاد..بالاضافة الى الرجال و النساء..

و هذا بالطبع شيء سلبي..

لانه في هذه الفترة يكثر وجود الـ(مغازلجية)..

و هم ليسوا بحاجة الى تعريف..

المهم المكان كان مكتظ بالبشر..

و مب لازم اذكرالتفاصيل لانها مملة و رتيبة..

زيارتي اليوم كانت افضل نوعاً ما..

المهم..سرت المعرض بالتكسي لاني اضطريت بعد ان تقطعت بي السبل..

في الموقف مال التكاسي كان في واحد مصري واقف..

المهم بعد تقريباً عشر دقايق حصلت تاكسي..خبرته عن المكان..ما عرفه ><"

نزلت من التاكسي لاني ما اعرف ادله عالمكان للاسف..

اول ما طلعت سألني المصري:ليه طلعتوا..

خبرته انه ماعرف المكان و اني ما اعرف ادله..

قال:انتوا مواطنين و ما بتعرفوش تدلوه عالمكان!!..

سكتت..بصراحة تفكير غريب..ياخي لاني مواطن يعني انا ملزم بحفظ اسامي و ارقام الشوارع!!..

الله ستر ولا كان بينقع البكس لوول..

بعد ما وصلنا المعرض تجولت في انحاءه و اشتريت 6 اشياء فقط..

و هذي يمكن اقل مرة اشتري فيها من المعرض..

الاشياء كانت:1- ستكرات على شكل سمايلي فيسس لاختي الصغيرة..

2-ستكرات على اشكال نجوم برضوا لاختي الصغيرة لوول..

3-دفترين تلوين للاخوات الصغيرات ههه..

4-مجلة سوبر للاخ الموقر الي هو انا..

فقط لا غير..

بعد الانتهاء اتصلت في اخوي عشان يمر علي..

و طلعت برع اترياه..و هني يبدأ الاكشن..

اول ما طلعت حصلت مجموعة من الباكستانيين يستغلون الاجانب بشكل غير شرعي<<حلوة هاي..

يعني يوصلونهم الى اي مكان مقابل مبلغ من المال طبعا بسياراتهم الشخصية..

و هذا الشيء ممنوع منعاً باتاً..

في البداية ما اهتميت وايد..يلست عالكرسي انبش في الموبايل..

الا و اييني واحد سعودي ريال طول و عرض و قال:انا جيت بعشر و هم يبغوني ادفع اربعين!!اتجننو؟!!..

المهم انا ضحكت ضحكة استهزاء و هو سار و وبدا يدخن ويستمتع بالشفط و النفخ لوول..

المهم بعد ما شفت ان الباكستانيين ينصبون على الاجانب الي على نياتهم قررت اني اوقفهم عند حدهم<<عاش راعي الفزعة ههه..

سرت مكان بعيد شوي و طلعت سلاحي السري (الموبايل) و اتصلت بالشرطة..

و خبرتهم بالسالفة..خذوا اسمي و قالولي خلاص نحن بنتفاهم وياهم..

بس لسوء الحظ وصل اخوي و ما قدرت اعرف شو الي صار بعدين !_!..

المهم فيالسيارة اتصل علي رقم غريب قالي:انت فلان الفلاني..قلت له:نعم..

قالي انت الي بلغت على كذا و كذا..قلت له نعم..قالي خلاص نحن بنتحراهم..قلت له مشكور..

حسيت اني سويت انجاز لوول..

بس للاسف ما قدرت اعرف شو الي صار بعدين><"

تمنيت ان اخوي تأخر شوي..عشان اتابع التطورات من ارض الحدث ههه..

المهم هذي هي القصة و ما فيها..باختصار شديد جداً..لوول..

السؤال هو:الي انا سويته هل هو صح ام خطأ؟؟..

و هل هناك كان في حل افضل من هذا؟؟..

حفظكم الله و رعاكم..

Animation vs Animator!!!

السلام عليكم و رحمة الله و بركاته..

يبت لكم فيديو كوميدي ان شاءالله يلقى استحسانكم..

بصراحة ابداع يفوق الخيال..

و بتضحكون الى ان تملون من الضحك!!

اترككم مع الفيديو :)

Wo0o0o0o0W

شو رايكم؟؟..

جمعة مباركة

السلام عليكم و رحمة الله و بركاته..

:

:

:

:

::

جمعة مباركة عالجميع ان شاءالله..

جمعت لكم بعض الاحاديث عن يوم الجمعة و ان شاءالله تستفيدون منها..

قال رسول الله عليه وسلم: (( إن من أفضل أيامكم يوم الجمعة فأكثروا علي من الصلاة فيه فإن صلاتكم معروضة)) الحديث[رواه أبو داود].

قـال النبي صلى الله عليه وسلم: ((لا يغتسل رجل يوم الجمعة ويتطهر ما استطاع من طهر ويدهن من دهنه أو يمس من طيب بيته ثم يخرج فلا يفرق بين اثنين ثم يصلي ما كتب لـه ثم ينصت إذا تكلم الإمام إلا غفر له ما بينه وبين الجمعة الأخرى)) [رواه البخاري].

الثقفي قال : سمعت رسول الله صلى الله عليه وسلم يقول : (( من غسل واغتسل يوم الجمعة وبكر وابتكر ومشى ولم يركب فدنا من الإمام واستمع ولم يلغ كان له بكل خطوة أجر سنة صيامها وقيامها )) [رواه أحمد ] .

عن أبي سعيد الخدري قال قال رسول الله صلى الله عليه و سلم: (( من قرأ سورة الكهف ليلة الجمعة أضاء له من النور فيما بينه وبين البيت العتيق )) (إسناده له حكم الرفع كما قال الألباني ) .

جميع الاحاديث منقولة من مقالة للشيخ محمد عبدالله الهبدان بعنوان:كيف يستفيد الشاب بيوم الجمعة..

لا تنسون تقرون سورة الكهف..

استودعكم الله الذي لا تضيع ودائعه..

اغنية سوبر ماريو بالعود و الجيتار

السلام عليكم و رحمة الله و بركاته..

:

:

:

:

اكيد كلكم تعرفون سوبر ماريو..

يبتلكم فيديو عن شباب اثنين يعزفون اغنية سوبر ماريو واحد بالعود و الثاني بالجيتار..

استمتعوا و تذكروا الايام الخوالي ههه..

قمة الاحباط..و لكن عند الله الفرج..

السلام عليكم و رحمة الله و بركاته..

:

:

:

:

:

:

سالفة يديدة عن المدارس و يا كثر سوالف المدارس..ما تنتهي ابداً!!..

امس كان عندي تسليم مشروع الانجليزي و كان الموضوع عن مهنة او وظيفة المستقبل..

طبعا الاستاذ خبرنا عن هالشيء من يوم الخميس..يعني كان عندنا ثلاث ايام اجازة و من بعدها يوم التسليم..

لكن انا قررت اني أأجل السالفة الى اخر يوم في الاجازة..كالعادة يعني لوول..

ممكن تسمونه اهمال كسل..سمه ما شئت..

المهم..في اليوم الاخير من الاجازة تذكرت عن المشروع الساعة 1 الليل!!..

و اسميني توهقت وهقة..

سرت عند اخوي و استخدمت البي سي ماله لاني انا ما عندي الاوفس في اللاب توب @_@

و طبعاً الواحد يوم يستخدم شيء ما يملكه ابداً ما ياخذ راحته..

و عشان هالسبب حاولت اني اخلص باقصى سرعة ممكنة..

في البداية قررت اني اكتب عن مهنتي الي اتمناها و الي هي لاعب كرة قدم 0_0 في الاحلام يعني لوول..

و لكن..بعد البحث في مستر جوجل عرفت ان المهمة صعبة..

لان هالمهنة مافي شيء اكتبه عنها ><"

لانه ما يبالها شهادات مثلا او متطلبات الخ..

فـ خطرت في بالي فكرة<<<يا ابو الافكارانته..

تذكرت ان الاستاذ معطنا ورقة عمل عن مهنة الـArchitecture...

و هالورقة فيها معلومات وافية عن هالمهنة..

فاستغليت هالشيء لصالحي و قررت اني اكتب عن هذي المهنة..

مع اني ما احبها ولا احب الهندسة لان اثنينتهم يعتمدون على الرياضيات..و الرياضيات تصيبني بالغثيان و الدوار و الهلوسة الخ..

باختصار..اكره الرياضيات..

لكن هالمهنة كان من السهل جداً الكتابة عنها..

كتبت و كتبت و كتبت..خلصت 6 سلايدات باور بوينت..

لا تقولون لي شوية ترى الاستاذ هو الي طلب منا ستة..

المهم استعرت فلاش اخوي عشان اسلم المشروع..

و ما رقدت :( تميت سهران كله لاجل هالمشروع..

في يوم التسليم انا فرحان لاني خلصت المشروع بجهد جهيد..

في الحصة السادسة يا وقت التسليم..سلمت الفلاش حق الاستاذ..

فجأة و بصوت عالي:حأ مين هادا الفلاش؟؟..

انا:مالي يا استاذ..

الاستاذ:تعا..

سرت عنده..حصلت عالشاشة برنامج الانتي فايروس و مكتوب عليه بان الفلاش فيه 224 فايروس ×_×

خييييييييييييبة!!..

و بكل برادة شل الفلاش و عطاني و رديت مكاني اجر اذيال الخيبة..

منتهى الاحباط..

لا مجال للتعويض..اليوم هو اخر يوم للتسليم يعني راحت عي 30 درجة بالتمام و الكمال..

.................................

في اليوم التالي الي هو اليوم..

و في الحصة الخامسة..

الاستاذ..قرر انه بعطيني درجة كاملة في المشروع!!..

و انا خلاص طاير من الفرحة..

و ايضا قرر انه يمدد فترة التسليم الى يوم الاربعاء..

و خبرنا ان الي سلموا في اليوم الاول كلهم بيحصلون علامة كاملة..و كانوا فقط 4 طلاب!!..و من بينهم انا^^

فرحت الصراحة..

لكن في نفس اليوم استاذ التاريخ وداني عند الاخصائي ><

الله يهديه بس..خرب علي المود..

المهم..

هذا هو الي حصل و هذا هو الي صار..

تحياتي لكم يا شطاار ههه I'm a poet and i don't even know it LooL

الرب لكم حافظ..

يوم ان احترقت المدرسة

السلام عليكم و رحمة الله و بركاته

يوم ان احترقت المدرسة

:

:

:

:

في يوم من الايام و سالف العصر و الاوان<<<خلصنا!!!

نشيت الصبح و ما كان لي خاطر اسير المدرسة كالعادة يعني

بس هاليوم غير..

ركبت الباص..رقدت كالعادة ههه بسبة السهر..

فنص الطريج نشيت..

تذكرت ان علينا امتحان رياضيات و انا ما درست ولا بطلت الكتاب..

يا ربي و الحل..

يلست ادعي ربي انه يستوي شيء ما يخليني امتحن..

المهم..تميت ادعي و ادعي وادعي..

و صلنا المدرسة..

لكني لاحظت شيء غريب..في طلاب يالسين برع المدرسة!!

وصلت عند البوابة..سلمت على ربيعي و على غير العادة لقيته فرحان و مبتسم..

سألته:شو السالفة؟؟..

رد علي:احترقت المدرسة..خلاص ماشي دراسة!!

وانا عيوني جي 0_0..

احللللللف..

والله احترقت لو ما تصدقني تعال..

سرت معاه حصلت جدامي شرطي يالس على كرسي خشبي و الطلاب الصغار ملتفي حوله و يالسين يطالعونه..

و يسألونه و يسولفون معاه..

المهم تميت اسولف ويا ربعي..

و الاشاعات بدت تنتشر ان مجموعة من الشباب يو في الليل و حرقوا المدرسة..والي يقول التماس كهربائي و الي يقول انه جاف الاولاد و هم يحرقون المدرسة!!..

المهم كثر القيل و القال..

بعدها الاخصائي يا و قال:كل صف يسوي حلأة و يوعد اودام مدرس الحصة الاولى..بسرعة..

ههه..يلسنا جدام المدرس مالنا و كان استاذ الرياضيات..جفتوا المصادفة!!..

المهم قال بسألكم اسألة ><"

عقب انا عرفت انه بيمتحنا..قلت حق ربعي محد يجاوب عليه ههه..و طبعا بما اني زعيمهم كلهم سمعوا كلامي الا واحد..

و هالواحد كان الدحيح مال صفنا..زلمة طبعاً..

في النهاية ما امتحنا..

وصلت الباصات..

و على عكس التوقعات..ما بنرد بيوتنا!!..يالهوييييي..ههه..

تعرفون وين بنسير؟؟..

الكورنيش!!!!!!!!..هو وقته الحين!!..

ركبنا الباصات و سرنا الكورنيش اليديد..و على ايامها كانوا بعدهم مب مخلصين منه كامل..

و لانا كنا يهال و مب جايفين خير لوول..ركضنا سيييدة عالبحر..و تمينا نلعب لين ما يانا الاستاذ و عصب علينا و تم يصارخ في ويوهنا ههه..

سرنا مكان و تمينا يالسين نسولف..

وصل باص يابوا فيه الاكل الي ما يسمن ولا يني من جوع..

و بما انها كانت مدرسة خاصة الاكل ما كفى..كالعادة يعني..

لكن الحمدلله حصلت نصيبي^^

سندويشة فلافل ويا عصير ههه بعدني اذكر..

المهم بعض الطلاب اتصلوا في اهاليهم و ردوا البيت..

و انا ما كنت منهم للاسف ><

تأخرناااا..

مليت من الانتظار انا..

سرت يمعت الشلة مالتي..

كل واحد طلع مصروفه و سرت انا و ربيعي الدكان و اشترينا بيبسي و هالسوالف..

الصراحة وناااسة عالاخر..

ردينا..كل واحد اكل و شرب عكيف كيفه..

بعدين ربيعي رد البيت..

تميت انا و الباقين نسووولف..

عقب بعض الشباب الله يجزيهم اخير اشترروا كورة اصلية من المارينا مول ههه..و طبعا بدون ما يدري الاستاذ..

قسمنا فرق و لعبنا..

بعدين وصلت الباصات..

ركبنا الباصات و وصلنا المدرسة..

يلسنا شوي في الساحة الصغيرونة..

حصلنا الشرطي مطلع مدواخه و يالس يدوخ ههه الحبيب ماخذ راحته..

و اليهال يطالعونه و هو فرحان!!..الله يهديه بس..

خلص الدوام..وللاسف الحريجة كانت في يوم الاربعاء يعني نهاية الاسبوع,,يعني ماشي اجازة للاسف..

تمنيت انها تكون في يوم الثلاثاء عشان يعطونا يوم واحد اجازة عالاقل ><

المهم..رديت البيت و خبرت اهلي بالسالفة..

و الحمدلله عدت الامور على خير..

و هاي هي سالفة الحريجة باختصار يعني..

و اتمنى انها عيبتكم^^

الردود الله لا يهينكم..

صفحة من مذكراتي

السلام عليكم و رحمة الله و بركاته

اممم..وا نا يالس افكر عن موضوع اكتب لكم عنه تذكرت شيء صارلي قبل فترة او خلنا نقول سنين..

طفولتي..

كنت طفلا هادئاً احيانا مزعجا كثيرا!!

مؤدبا في الروضة و لكن مشاغبا جدا في المرحلة الابتدائية لدرجة ما بتتوقعونها..

الاساتذة كرهوني لوول..

اممم..و لكن بعضهم و رغم مشاغبتي الزائدة كانوا يحبونني!!

اذكر يوم كنت صف ثاني الابلة غابت عنا ايام و عقب خبرونا انها يابت ولد و بترد بعد فترة الموهم..

يوم ردت سألها احد الطلاب عن اسم ولدها..

فردت عليه ان اسمه نفس اسمي انا و انها سمته على اسمي محبة فيني!!

بصراحة استغربت..

لكني في نهاية السنة طلعت الاول..هل هو بمجهودي ام بمساعدة منها؟؟..

ان شاءالله بمجهودي..

و اذكر مرة انها قالت لي اتمنى ان ولدي يكون مثلك!!

لهدرجة يعني!!

المووهم..

لطفولتي وجه قبيح ايضا..

يا كثر المرات الي اخذت فيها علقات ساخنة..

ايدي ورمت حتى :(

صار عندي انعدام في الشعور..صرت ما احس بالضرب على ايدي..

اذكر اني في مرة انظلمت من استاذ الرياضيات الي كنت اكرهه و كان يكرهني لوول..

و السبب ان ولد المدير الصق فيني تهمة باطلة و خلاني اخذ ضربة بالمسطرة المطاطية على ايدي و انتوا تخيلوا مدى الالم و خصوصا

عندما يأتي من مسطرة مصنوعة من المطاط ><

بس ما صحت ولا دمعت..

ههه صدق انعدام في الشعور..

واذكر اني كنت اشرد واااايد من المدرسة وخصوصا ايام الامتحانات..

ما كنت افوت فرصة الشردة ههه..

و جدام الاخصائي بعد..

هههه الله يرحمها من ايام..

كنت اسير الدكان و الكفتريا..

حليلي مسكين..

الناس يردون البيت و انا اسير الدكان لوول..

اممم..

ترقبوا الجزء الثاني بعنوان:

يوم ان احترقت المدرسة..

ترقبووووا لان فيه اثارة و حماس و متعة لوول..